SOUTH COTABATO- Taliwala gihapon sa krisis sa enerhiya, nakakita og direktang solusyon ang South Cotabato aron mapaubos ang presyo sa lana.
Sa interview sa Bombo Radyo Gensan, gibutyag ni Gov. Reynaldo Tamayo nga nahimong malampuson ang ilang deal sa international supplier aron masiguro ang supply sa fuel sa ilang probinsya.
Gipahibalo sa nasampit nga ang South Cotabato hapit na makompleto ang kasabutan sa pag-import og 30 milyon ka litro nga fuel gikan sa usa ka kompanya sa Malaysia.
Daghang agian nga proseso diin mitabang usab ang Department of Energy pinaagi ni Sec. Sharon Garin subay sa kamandoan usab ni Pangulong Bongbong Marcos Jr. Anaa na sa final stage ang pagproseso sa Letter of Credit (LC) human mahatag ang invoice sa supplier.
Kung mahuman, posibleng magsugod dayon ang deliveries nga gilauman sa sunod semana. Tumong niini nga madugangan ang suplay aron mapaspasan ang pagkunhod sa presyo sa gasolina.
Sumala usab ni Gov. Tamayo nga ang maong dakong lakang nga gumikan sa lig-on nga partnership sa pribadong sektor diin nakatabang sa dali nga pagdesisyon ug implementasyon.
Gitan-aw usab nga kini usa ka posibleng ‘game-changer’ sa pakigbatok sa pagsaka sa presyo sa gasolina.
