Gisusi na sa Police Regional Office 12 (PRO12) kung kinsa ang responsable sa pagpakatag sa usa ka hulga sa social media nga nag-ingong mangpusil sa mga estudyante ug magtutudlo sa dua ka tulunghaan dinhi sa dakbayan sa Heneral Santos.
Matud ni P/BGen. Allan Manibog, Regional Director sa PRO12, ilang gipahibalo dayon ang tanang kawani sa kapulisan kalabutan sa maong impormasyon ug gimandoan ang pagpangita kung kinsa ang naa sa luyo sa maong social media account.
Dugang ni Manibog, nakig-alayon dayon sila sa mga apektadong tulunghaan pinaagi sa pakigpulong sa mga opisyal sa eskwelahan ug mga opisyal sa barangay aron mapalig-on ang seguridad.
Gipasiguro sa hepe sa PRO12 nga padayon nilang bantayan ang kahimtang ug ilang hatagan og prayoridad ang kaluwasan sa mga estudyante, magtutudlo, ug uban pang personahe sa mga tulunghaan.
