Mas mapadali na alang sa mga kwalipikadong pasyente sa Sarangani ang pagkuha og dialysis treatment human pormal nga nakasulod sa 10 ka tuig nga kasabutan ang Provincial Government sa Sarangani ug ang Premier 101 Healthcare Management, Inc. alang sa operasyon sa Sarangani Dialysis Center.
Pinaagi sa maong kasabutan, ipatuman ang zero balance billing alang sa mga kwalipikadong pasyente, diin walay dugang nga bayranan ang pasyente alang sa ilang dialysis treatment.
Gipirmahan ni Gobernador Rogelio D. Pacquiao ug Premier 101 President Philip V. Lim ang kasabutan niadtong Agosto 18 sa Kasfala Hall, Capitol Compound.
Ubos sa kasabutan, ang Premier 101 maoy modumala sa operasyon sa dialysis center nga nahimutang sulod sa Sarangani Provincial Hospital Compound sa Alabel.
Adunay 20 ka hemodialysis chairs ang pasilidad, lakip ang mga treatment area, isolation area, consultation rooms ug nurses’ stations.
Gilauman nga pinaagi niini, dili na kinahanglan nga mobiyahe pa ang mga pasyente sa gawas sa probinsya aron lamang makadawat og regular nga dialysis, samtang maminusan usab ang ilang pinansyal nga palas-anon sa padayong pagtambal.
