Nagpadayon ang ginahimong imbestigasyon sa Police Station 6 human makaplagan ang usa ka fetus sulod sa comfort room sa usa ka inn sa J. Catolico Avenue, Barangay Lagao, ning dakbayan.
Nakig-alayon na ang mga imbestigador sa pagdumala sa maong inn aron makuha ang CCTV footage nga makatabang sa pag-ila sa tawo nga responsable sa pagbiya sa fetus. Sa inisyal nga pagsusi, gituohang lalaki ang fetus ug gibanabana nga anaa na sa pito hangtod walo ka bulan ang gidugayon sa pagmabdos.
Human sa pagresponde sa kapulisan, gilayon nga gipaubos ang fetus alang sa medico-legal examination aron matino ang eksaktong kahimtang ug makatabang sa nagpadayong imbestigasyon.
Nasayran nga usa ka room boy ang unang nakadiskobre sa fetus pasado alas 6:00 sa buntag samtang naghinlo sa comfort room.
Gireport dayon niya ang insidente sa pagdumala sa establisemento, nga maoy mipahibalo sa kapulisan.
Padayon karon ang pagtipon sa mga ebidensya sa mga awtoridad aron mailhan ang responsable ug mapasakaan sa angay nga kaso
