Wala na nakakuha bisan usa ka gamit si Miriam Esver, residente sa Upper Puting Bato, Barangay Calumpang, General Santos City, human kalit nga misulod ang tubig baha sa ilang panimalay.
Matud ni Esver, paspas ang pagsaka sa tubig maong wala na sila’y higayon nga makapanghipos sa ilang mga gamit ug ang ilang unang gihunahuna mao ang pagluwas sa ilang kaugalingong kinabuhi.
Dugang pa niya nga dili pa sila andam nga mobalik sa ilang balay tungod sa kahadlok sa kadako sa tubig baha ug sa posibleng peligro nga ilang maatubang.
Mapasalamaton hinuon si Esver sa paspas nga pagresponde sa mga rescue team nga mitabang aron mahan-ay sila ngadto sa evacuation center ug masiguro ang ilang kaluwasan.
Nagpabilin silang naglaum nga mohubas na ang tubig ug mobalik na sa normal ang kahimtang sa ilang lugar.
