GENERAL SANTOS CITY – Giangkon ni Col. Tyne Bañas, labaw sa 1002nd Infantry Brigade Philippine Army, nga aduna silay mga nadawat nga report kalabot sa mga opisyal sa lokal nga panggamhanan, hilabi na mga local chief executives nga may koneksyon sa mga rebelde o teroristang grupo sama sa NPA ug Abu Sayyaf.
Matud pa nga may mga indikasyon silang namatikdan nga may mga local chief executives nga paling-paling ug nakigtabangay sa mga rebelde, butang nga dili gayud matud pa maayo.
Samtang sa laing bahin, positibo ug andam si Col. Bañas sa gianunsyo na usab sa gobyerno nga ipadayon ang peacetalks kon hinabing pangkalinaw sa CPP-NPA-NDF.
Sumala pa nga usa sa labing naghandom ug kalinaw mao ang kasundaluhan. Hinungdan nga andam matud pa silang tumanon kini, dungan sa pagsiguro gihapon sa kalinaw ug seguridad sa katawhan.
Apan kinahanglan matud pang magtinabangay ang duha ka kampo ug angayang wala nay mahitabong lokohan, hilabi na nga hugot ang pagpaningkamot sa gobyerno nga makab-ot gayud ang gipangandoy nga malungtarong kalinaw.
