Naghulga si US President Donald Trump nga posibleng atakehon ang Oman, usa sa giilang kaalyado sa Amerika, kon dili kini magtarong o mag-“behave.”
Gibuhat sa presidente sa US ang maong pamahayag human sa mga taho mahitungod sa giingong negosasyon tali sa Iran ug Oman.
Sumala sa mga report, nagplano ang duha ka nasud nga maningil og toll sa mga barkong moagi sa Strait of Hormuz.
Ang maong Strait giila nga usa ka kritikal nga agianan sa mga oil tanker sa tibuok kalibotan ug temporaryong nasirado sukad nagsugod ang gubat sa US ug Israel batok sa Iran.
Una nang gideklarar ni Trump niadtong Martes nga ablihan pag-usab ang maong agianan alang sa tanan ug iyang giingong walay nasud nga adunay katungod sa pagkontrol niini.
Matud pa niya, bantayan sa Amerika ang lugar isip kabahin sa ilang kasamtangang seguridad ug operasyon militar.
Sa pagkakaron, wala pa’y gipagawas nga klaripikasyon ang White House kabahin sa kontrobersiyal nga pahayag ni Trump ug wala usab motubag sa opisyal nga paagi ang Embahada sa Oman sa Washington mahitungod sa maong isyu.
