GENSAN- Dili makonsidera ni Atty. Rogelio Garcia, PDP-Laban Regional President, nga crime against humanity ang war on drugs sa administrasyon ni kanhi Pangulong Rodrigo Duterte.
Matud niya, isip abogado, kulang pa ang basehan aron masulti nga sistematikong paglapas sa tawhanong katungod ang nahitabong kampanya kontra iligal nga droga.
Gipunting usab niya nga bisan pa sa giingong liboan nga mga biktima, gamay ra ang gidaghanon sa mga testigong gipresentar aron mosuporta sa alegasyon.
Sumala ni Garcia, ang kapulisan mismo niingon nga kadaghanan sa mga namatay resulta sa lehitimong operasyon ug engkuwentro.
Busa, importante matod pa susihon pag-ayo ang police reports aron masabtan kung unsay tinuod nga nahitabo sa matag insidente.
Alang kaniya, ang pagdeterminar kung crime against humanity ba ang war on drugs magdepende gihapon sa legal nga proseso ug desisyon sa korte.
