Gipaklaro ni Barangay Tinagacan Kapitan Jeoffrey A. Salanio ang nahisgutan bahin sa reklamo ni Cherryl B. Alam kalabot sa guba nga pader ug pag-awas sa tubig sa ilang propiedad.
Sumala kang Salanio, nasayran na sa barangay ang maong problema sukad pa niadtong miaging tuig ug nakahimo na og panaghisgot ang mga hingtungdan. Matud niya, aduna na usab umanoy gihatag nga kompensasyon kang Alam isip kabahin sa ilang naunang panag-istoryahanay.
Gisugyot sa kapitan nga balikan ug susihon pag-usab ang maong lugar aron makita ang aktuwal nga kahimtang ug matino ang angay nga solusyon sa reklamo.
Samtang, nagpadayon usab ang reklamo ni Chelsie Valles bahin sa giingong pag-awas sa baho nga tubig gikan sa usa ka poultry farm nga nakaapekto umano sa ilang mga pananum ug gikabalak-an usab sa mga residente nga mahimong mainom sa ilang mga binuhing hayop.
Nanawagan ang mga residente sa mga hingtungdan nga mahatagan og klaro ug malungtarong solusyon ang maong mga problema.
