GENERAL SANTOS CITY – Gikumpirma ni Atty. Richard Opinion sa Internal Affairs Service sa General Santos City Police Office (GSCPO) nga wala na nila napadayon ang pagproseso sa reklamo batok kang Staff Sergeant John Rey Daligdig kalabot sa pagpanghikap og sampot sa usa ka dalaga.
Matud ni Atty. Opinion, wala na nagpakita sa ilang buhatan ang 20 anyos nga reklamante nga ilaha nga gimaymayan nga magdala og mga testigo nga ikasuporta sa pagpasaka og kaso batsok kang Daligdig.
Apan sa ilang pagtuo nga may giduolan nga laing ahensya ang reklamante alang sa pagpasaka og kaso.
Sa pamahayag ni Atty. Opinion nga dili nila mapugos ang reklamante kung unsa ang gustong mahitabo apan andam gihapon ang IAS sa pag-akomodar kaila ugaling nga ipadayon ang pagpasaka og kaso.
Nasuta nga restricted karon si Daligdig samtang nag-atubang og kaso. Apan una niini gi-disarmahan ang nasampit sa iyang service firearm.
Kahibaluan nga nangayo og tabang sa Bombo Radyo ang mga reklamante human nga gihimas ni Daligdig ang sampot sa babaye.
Gikabutyag nga niadtong tungura, anaa sa impluwensya sa ilimnong makahubog ang maong pulis kung asa gisinggit-singgitan ang mga igsuon sa dalaga gawas pa nga gihadlok nga adunay pusil sa sakyanan niini.
