Gipaabot nga mosaka na usab ang presyo sa mga produktong petrolyo karong Abril 29, matod sa Department of Energy (DOE), nunot sa nagkagrabeng tensyon sa suplay tungod sa bag-ong mga silot nga gipahamtang sa Estados Unidos batok sa oil shipping network sa Iran.
Matod ni Assistant Director III Rodela Romero sa Oil Industry Management Bureau, ania ang gipaabot nga pagsaka sa presyo:
Gasolina: P0.80 – P1.40/litro
Diesel: P0.40 – P1.00/litro
Kerosene: P0.50 – P0.70/litro
Ang pagsaka sa presyo nagsunod sa lakang sa Treasury sa US nga silotan si Seyed Asadoollah Emamjomeh, usa ka Iranian LPG magnate, ug ang iyang corporate network. Sumala sa US Treasury Secretary Scott Bessent, ang grupo ni Emamjomeh ang responsable sa pag-eksport sa minilyon nga dolyar nga kantidad sa Iranian LPG ug krudo sa mga langyaw nga merkado aron makalikay sa mga silot sa US.
Gawas pa niana, ang presyo naapektuhan usab sa pagkunhod sa imbentaryo sa lana sa US, nga nagpakita sa mas taas nga panginahanglan.
