Pormal nang gitangtang sa House prosecution panel ang bribery charge batok kang Vice President Sara Duterte aron mapadali ang impeachment trial.
Gikumpirma kini ni House Prosecutor ug Manila Representative Joel Chua.
Sa pakighinabi sa Bombo Radyo kang Chua, iyang gisulti nga ilang nakaplagan ang maong desisyon niadtong miaging semana, human usab tangtangon isip testigo si kanhi Senator Antonio Trillanes.
Matud ni Chua, nagtuo ang prosecution nga igo na ang ebidensyang ilang napresentar alang sa tulo ka laing impeachment charges, busa dili na kinahanglan nga ipadayon ang Article III o bribery case.
Sumala niya, tumong sa maong lakang nga malikayan nga moabot pa sa sunod tuig ang impeachment trial.
Gilauman nga ipadayon sa prosecution ang presentasyon sa mga testigo ug dokumento kalabot sa Article II, lakip ang mga isyu bahin sa giingong ‘unexplained wealth’ ni Duterte.
Gilimod ni Chua nga ang pag-atras sa bribery charge timailhan sa kakulang sa ebidensya, ug matud niya nga mas gusto sa prosecution nga mahuman ang trial sulod niining tuiga.
Gilauman usab nga magpagawas og opisyal nga pahayag ugma si Lead Prosecutor ug Rep. Gerville Luistro kalabot sa ilang desisyon nga itangtang ang bribery case.
