GENSAN- Gisaysay ni Josephine Latore, school principal sa Jose Divinagracia Senior Elementary School, ang dakong kausaban sa pamaagi sa pagtudlo ug pagdisiplina sa mga estudyante kaniadto kon itandi sa kasamtangang panahon.
Matud ni Latore, mas istrikto ang pagdisiplina sa mga bata kaniadto, diin kasagarang kasab-an sila sa magtutudlo kon adunay sayop nga nahimo.
Apan karon, mas limitado na ang pamaagi sa mga magtutudlo sa pagdisiplina tungod sa posibilidad nga moreklamo ang mga ginikanan kon ilang kasab-an ang ilang mga anak.
Matud pa niya, usa usab sa hagit sa mga magtutudlo ang kadaghan sa mga estudyante sa classroom nga mahimong moabot sa 35 hangtod 40 ka bata sa usa ka klase.
Tungod niini, gigamit sa mga magtutudlo ang nagkalain-laing ‘instructional materials’ sama sa laptop, telebisyon ug uban pang teknolohiya aron makuha ang atensyon sa mga estudyante.
Sumala ni Latore, makatabang kini aron dili ma-bored ang mga bata ug mas mapadali ang paghatud sa leksyon sa sulod sa classroom.
