Gipaniguro sa Department of Agriculture sa publiko nga adunay igo nga suplay sa pagkaon ang nasod karong gihulga sa ‘Super El Niño’ sa umaabot nga mga bulan.
Sumala ni Agriculture Secretary Francisco Tiu Laurel Jr., nag-andam ang gobyerno sa posibleng grabe nga epekto sa ‘Super El Niño’.
Matod niya, importante nga mapuno og bugas ug humay ang mga bodega sa National Food Authority (NFA) aron adunay igong ‘buffer stock’ kung mokunhod ang produksiyon tungod sa El Niño.
Gipasabot usab niya nga adunay pondo ang gobyerno alang sa pagdugang sa suplay sa abono, ilabina sa mga lugar nga adunay igo nga tubig.
Usa usab sa mga lakang mao ang pagdugang og 65 ka bodega sa nagkalain-laing bahin sa nasod, diin mokabat na sa 364 ang kinatibuk-ang gidaghanon sa mga bodega sa tibuok nasod.
Gilauman nga makatabang kini sa pagseguro sa suplay sa pagkaon bisan pa sa posibleng epekto sa ‘Super El Niño’.
