GENSAN- Gikumpirma ni Dr. Karl Igrobay, Assistant Department Head sa City Health Office nga usa sa mga posibleng rason sa pagsaka sa mga kaso sa HIV ug STDs sa dakbyan mao ang presensya sa mga gitawag nga “walker”.
Gipasabot ni Dr. Igrobay nga kining mga “walker” o escort kasagarang makita nga nakiglambigit sa pagbayloay og sekswal nga pabor nga daling ma-access karon pinaagi sa social media.
Bisan pa man, iyang giklaro nga dili tanang “walker” nagdala og awtomatikong sakit, apan ang maong matang sa kalihokan nagdala gihapon og taas nga risgo sa panglawas.
Tungod niining delikado nga pamatasan o high-risk behavior, dako ang tsansa nga mapasa ug makuha ang mga sakit nga mapasa pinaagi sa pakighilawas.
Gumikan niini, padayon ang pagpakatag sa pahibalo sa publiko mahitungod sa kapeligrohan niini aron mapugngan ang dugang pa nga pagkaylap sa maong mga sakit.
