-- ADVERTISEMENT --

Gihangyo sa defense team ni kanhi Pangulong Rodrigo Duterte ang International Criminal Court (ICC) nga ibasura ang testimonya sa pangunang testigo sa prosekusyon.

Giinsistir sa depensa nga napakyas ang mga prosecutors sa pagpamatuod nga dili angay o dili mahimong mosaksi ang ilang testigo.

Matod pa nila, dili usab katuohan ang mga pahayag sa maong testigo ug mahimong dili patas kini alang sa mga akusado.

Sa petisyon nga gisumite niadtong Nobyembre 18, gihangyo sa depensa ang ICC Trial Chamber nga ibasura ang hangyo sa prosekusyon nga dawaton isip ebidensya ang testimonya ni Witness P-0002, nga usa sa kanunayng gigamit nga tinubdan sa impormasyon sa prosekusyon sa kaso batok kang Duterte.

Gikuwestiyon usab sa depensa ang pahayag sa prosekusyon nga dili na makahatag og direktang testimonya si P-0002, tungod kay nagsalig lamang kini sa mga impormasyon nga giingong gihatag kaniya niadtong miaging tuig sa pipila ka indibidwal, nga walay kaubang dokumento nga mahimong ebidensya.

-- ADVERTISEMENT --

Matod pa sa depensa, una nang giingon sa prosekusyon nga mahimong mailhan pinaagi sa pahayag sa testigo ang usa ka bag-ong pamaagi, apan sa ulahi giangkon nga lahi ang probisyon nga gilatid sa Rome Statute.

Gikuwestiyon usab sa depensa ang kredibilidad sa testigo tungod kay nag-usab-usab matod pa ang iyang mga pahayag.

Gipasanginlan ang kanhing pangulo nga responsable sa mga pagpatay nga nahitabo atol sa iyang kampanya batok sa ilegal nga droga.

Gikatakdang ipahigayon sa Nobyembre 30 ang sunod nga hearing diin gilauman nga unang ipatawag ang lima ka testigo sa prosekusyon.

Samtang, magsugod ang winter break sa korte sa Disyembre 18.