-- ADVERTISEMENT --

Gikuwestiyon ni Vice President Sara Duterte ang hepe sa Philippine National Police (PNP) kalabot sa pahayag niini nga nagpabiling “apolitical” o walay gikilingang politika ang nasudnong kapulisan. Giinsistir sa bise presidente nga nahimo matod pa tigpatuman sa interes sa mga politiko ang maong institusyon.

Sa opisyal nga pahayag nga gipagawas sa Office of the Vice President (OVP) niadtong Nobyembre 21, 2026, gisaway ni Duterte ang pagdeklara dayon sa PNP Chief nga walay nahitabong “rescue” bisan wala matod pa kini maampingong maimbestigahan.

Matod sa bise presidente, wala man lang siya o ang ubang nalambigit nga tawo pangayoa og pahayag kalabot sa maong panghitabo, nga alang kaniya nagbutang sa peligro sa pagkamatarong ug pagsunod sa kapulisan sa due process.

Gibutyag usab ni Duterte nga adunay dili moubos sa lima ka dokumentadong hulga nga anaa sa ilang kampo, nga gikan matod pa sa pipila ka personnel sa PNP ug gitumong batok kaniya, sa mga kawani sa OVP ug sa iyang pamilya.

Giinsistir niya nga dili kini basta-bastang pangagpas o akusasyong politikal, apan wala silay kapadulngan aron mangayo og tabang.

-- ADVERTISEMENT --

Matod pa sa bise presidente, posibleng dili na niya mapresentar ang maong mga ebidensya atol sa impeachment proceedings human bawion sa prosekusyon ang reklamo nga grave threats batok kaniya.

Gitawag niya kini nga lakang nga adunay malisyosong katuyoan tungod kay wala kuno kini igong basihan sa kamatuoran ug balaod.

Dugang ni Duterte, ang iyang pahayag nga dili siya mobati nga luwas sa nasud nagpakita usab sa kahadlok sa daghang ordinaryong Pilipino nga wala mapanalipdi ang ilang mga batakang katungod.

Giawhag niya ang hepe sa PNP nga imbes nga panalipdan ang mga anaa sa gahum, mas tutokan hinuon ang katungdanan nga masiguro nga patas nga gipatuman sa balaod ang pagpanalipod sa matag lungsoranon.

Wala pa usab nagpagawas og tubag ang kapulisan kalabot sa mga alegasyon sa bise presidente.