Nagsaulog si Pope Leo XIV sa iyang unang misa isip bag-ong lider sa Simbahang Katoliko human sa paghimo sa kasaysayan isip labing unang papa nga natawo sa Amerika.
Ang Santo Papa nangulo sa pribadong misa uban sa mga cardinals sa Sistine Chapel sa mga alas 11:00 sa buntag, oras sa Roma o alas 5:00 sa hapon, oras sa Pilipinas karong Biyernes, Mayo 9, diin ang lider sa Simbahang Katoliko nihatag sa iyang unang homiliya isip Santo Papa sa English ug Italian.
Gisugdan sa Santo Papa ang iyang homiliya sa English diin nagpasalamat siya sa mga Cardinal electors sa ilang pagsalig kaniya.
Si Papa Leo XIV mihatag usab ug kinasingkasing nga pahinumdom sa mga kardinal nga sila gitawag aron sa pagsaksi sa ilang malipayong pagtuo kang Kristo nga Manluluwas.
Ang bag-ong Santo Papa nanawagan usab sa pagpalawom kanunay sa personal nga relasyon kang Kristo ug gipasiugda nga kung walay pagtuo, ang kinabuhi walay kahulogan.
Ang homiliya sa bag-ong lider sa Simbahang Katoliko, nga iyang gibasa sa Italyano, maoy usa ka pasidungog sa unang Santo Papa sa Simbahang Katoliko, si San Pedro ug nahinumdom sa iyang mga pulong nga mabasa sa ebanghelyo sumala ni San Mateo.
Gihinumdoman usab ni Papa Leo XIV nga gitawag siya sa Dios pinaagi sa iyang pagkapili isip ika-267 nga Santo Papa.
Gitapos sa Santo Papa ang iyang homiliya pinaagi sa pag-ampo.
“May God grant me this grace, today and always, through the loving intercession of Mary, Mother of the Church.”
