Nagdesisyon ang gobyerno sa Japan nga dugangan pa ang pagwagtang sa mga sanksyon batok sa Syria pinaagi sa pagtangtang sa mga ‘warning’ ug ‘restrictions’ batok sa 16 ka organisasyon didto.
Sumala kang Chief Cabinet Secretary Minoru Kihara, tumong sa maong lakang nga suportahan ang ‘rebuilding’ ug ‘reconstruction’ sa Syria human sa pagkapukan sa rehimen ni kanhi Presidente Bashar al-Assad niadtong 2024.
Gipadayag ni Kihara nga ang kalig-on ug pag-uswag sa Syria adunay direktang epekto sa kinatibuk-ang kalinaw sa tibuok Middle East, busa importante nga matabangan ang mga hingtungdan nga grupo sa ilang tagsa-tagsa ka tahas sa pagbangon pag-usab sa nasod.
Bisan pa niini nga lakang, nagpabilin gihapon ang mga sanksyon sa Japan batok sa 59 ka indibidwal ug 15 ka organisasyon sa Syria.
Ang lakang sa Japan misunod usab sa susamang mga desisyon sa United States ug European Union nga nagtangtang sa mga sanksyon isip suporta sa ‘political transition’ ug sa pagbangon pag-usab sa Syria.
