-- ADVERTISEMENT --

Magpakatap og kapin sa 6,000 ka pulis ang Philippine National Police o PNP sa Metro Manila aron siguruhon ang seguridad ug motabang sa mga commuter atol sa duha ka adlaw nga transport strike karong Nobyembre 23 hangtod 24, 2026.

Isip kabahin sa pagpangandam, magpatuman ang National Capital Region Police Office o NCRPO og libreng sakay gamit ang mga police bus, truck ug van sa Baclaran, Paco ug Nagtahan sa Manila, Caruncho Avenue sa Pasig City, ug South Caloocan.

Matod ni PNP Chief Police General Jose Melencio C. Nartatez Jr., tumong niini nga matabangan ang mga commuter sa ilang pagbiyahe samtang gitahod usab ang katungod sa mga transport worker sa pagpahigayon og malinawon nga protesta.

Makig-alayon usab ang PNP sa Metropolitan Manila Development Authority o MMDA ug sa mga lokal nga kagamhanan aron mapadayon ang kahapsay sa mga dagkong dalan ug terminal.

Gimandoan usab ang mga pulis nga magpatuman sa maximum tolerance ug magpakita og propesyonalismo sa tibuok panahon sa transport strike.

-- ADVERTISEMENT --