GENERAL SANTOS CITY – Padayon gihapon ang hugot nga gipahigayon nga imbestigasyon sa kapulisan sa Polomolok, South Cotabato sa pagpangita sa mga responsable sa sunod-sunod nga pagpatay sa nahisgutang lugar.
Luyo niini giangkon ni P/Lt Col. Marin Duadua, chief of police sa Polomolok, South Cotabato nga nalisdan sila sa pag-imbestiga sa pagkamatay sa duha ka sakop sa CSU nga dungan nga gipusil sa mga responsable.
Kini mao silang Jessie Arciete, 56 anyos og Bonifacio Cabisada, 58 anyos nga usa ka retired police.
Walay CCTV footage nga nakuha ang kapulisan sa nahitabuan sa kremin rason nga wala silay kaabag aron mapadali ang sitwasyon.
Gawas pa nga walay gusto nga magtestigo sa kremin.
Kahibaluan nga ang labing ulahing biktima mao si Donald Cabigas ang kanhi labaw sa CSU.
Sa miaging Nobyembre 2022 laing CSU member sa Polomolok ang gipusil patay gihapon.
Kahinumduman nga gikan sa P300,000 nga reward money , gipatas-an na ni Polomolok Mayor Bernie Palencia ngadto sa P500,000 sa makatudlo sa responsable sa mga pagpamusil patay sa mga CSU member.
