Gipasabot ni Senador Juan Miguel ‘Migz’ Zubiri ang pag-walkout sa iyang mga ka-ubanan sa minority bloc atol sa ilang katapusang sesyon dihang init nilang gilantugian ang amendment sa Senate rules online o virtual participation sa ilang sesyon sa mga ka-ubanan nga dili mapatambong physically.
Sa iyang gipatawag nga press conference sa Malaybalay City kagahapom, gipadayag sa senador nga dili lang simpleng walkout ang ilang gihimo kondili usa ka hait nga taktika sa pamalaod.
Iyang gipasabot nga napugos siya paggamit sa maong legislative strategy human matud pa gipugos sa mayorya nga botaran na ang mosyon ni Senador Rodante Marcoleta kansa gihulagway nila sa mayorya nga tyrannyo pagpangdaog-daog gamit ang ilang gidaghanon, bisan pa man nga nakita nga kuwang gihapon sila tungod kay onse lamang ka senador ang nabilin sa hawanan.
Dugang pa sa senador, ubos sa Senate rules, ang motion for adjournment o pag-undang sa sesyon tungod sa kawalay quorum maoy dako nga prayoridad ug dili na kinahanglan pa nga debatihan.
Gihisgutan usab ni Zubiri nga andam ug wala sila maglikay sa pakig-debate sa ilang mga kauban ug kamatu-uran niini ang ilang ka-andam nga ipadayon ang init nga diskusyon paggbalik sa sesyon karong Lunes aron hingpit nga mahatagan og igong panahon ang maong isyu.
