GENSAN- Gitawag og sayop sa usa ka abogado nga plunder ang mahimong kaso batok kang Senador Rodante Marcoleta tungod sa wala niya madeklarang campaign contributions.
Gipahayag ni Atty. Luis Salazar nga wala siya makakita sa mga elemento nga naglangkob sa kasong plunder ubos sa Republic Act 7080.
Matod niya, bisan pa og milapas sa P50 milyon ang kantidad sa donasyon nga nalambigit sa isyu, dili kini awtomatikong mahimong plunder tungod kay ang maong kuwarta dili man gikan sa pondo sa gobyerno kondili gikan sa mga pribadong indibidwal nga mitampo alang sa kampanya ni Marcoleta.
Gipasabot usab sa abogado nga ang plunder kasagarang nalambigit sa iligal nga paggamit o pagpangawat sa pondo sa gobyerno ug sa mga transaksyon nga adunay korapsyon o pabor nga gihatag isip kabaylo sa katungdanan sa usa ka opisyal.
Dugang pa niya, wala usab siyay nakita nga ebidensya nga ang mga donasyon gihatag isip baylo sa pag-apruba sa proyekto o uban pang pabor nga may kalabotan sa katungdanan ni Marcoleta isip opisyal sa gobyerno.
Busa, alang kang Atty. Salazar, lisod mapalig-on ang kasong plunder batok sa senador tungod kay wala matuman ang mga batakang elemento nga gikinahanglan sa balaod aron mahimong plunder ang usa ka kaso.
