Gianunsyo sa kontrobersyal nga direktor nga si Darryl Yap nga dili isalida sa tanang sinehan dinhi sa Pilipinas ang iyang pelikulang “The Rapists of Pepsi Paloma”.
Kini human niangkon nga wala nila makompleto ang mga dokumento nga gikinahanglan sa Movie and Television Review and Classification Board (MTRCB) alang sa mga rekisitos sa pagpagawas sa pelikula sa nitaliwan nga sexy star nga si Pepsi Paloma.
Gidugang pa niini nga gikonsiderar sa ilang team kung i-release ba ang nasangpit nga pelikula sa ubang kanasuran o focus na lang sa streaming platforms.
Dugang pa niini, ang direktor miingon nga ‘bisan pag tangtangon ang cork, ang imong espiritu magpabilin.’
Sa laing bahin, mahinumdoman nga ang MTRCB niingon nga dili nila madawat ang mga materyales gikan sa distributor nga PinoyFlix tungod kay kulang kuno kini sa mga gikinahanglang dokumento.
Base sa legal affairs sa division board sa maong ahensya, tulo ka importanteng dokumento ang kinahanglang isumite sa distributor ngadto kanila, lakip ang certificate o clearance nga magpamatuod nga walay pending criminal, civil, o administrative cases ang nasangpit nga pelikula.
Una nang gipasakaan ni Vic Sotto og 19 ka ihap sa cyberlibel si Yap kalabot sa maong movie teaser diin gipakita nga si Sotto maoy usa sa mga gidudahang nanglugos ni Paloma hinungdan nga nisang-at si Vic Sotto og petition alang sa writ of habeas data aron mapapas ang teaser nga gitugutan sa ulahi ni ang Muntinlupa Regional Trial Court apan wala kini makapugong sa pagpagawas sa pelikula ni Yap.
