Paghigugma sa nasud ug pagdumdum sa sakripisyo sa mga mitaliwan nga mga bayani sa nasud ang sentro sa mensahe ni Presidente Ferdinand Marcos, Jr alayon sa selebrasyon sa ika 127th Independence Day sa Pilipinas.
Unang milusad sa wreath laying ceremony ang pangulo uban ang iyang tibook pamilya, mga miyembro sa kasundaluan ug kapulisan sa Quirino Grandstand, Manila.
Sa iyang speech, mihalad ang presidente sa pasidungog sa mga bayani sama nila Dr. Jose Rizal, Andres Bonifacio, Apolinario Mabini, ug Melchora Aquino, lakip ang libuang ihap sa mga pinoy nga nagbuwis sa ilang kinabuhi aron makab-ot ang kagawasan sa nasud batok sa kamot sa mga kolonyalista.
Siya miingon nga tungod sa ilang sakripisyo, ang Pilipinas hinay-hinay nga mitubo isip usa ka Republika, bisan sa dagkong hagit sa kasaysayan, sama sa gubat, krisis sa lana, ug mga epekto sa globalisasyon.
Mipadayon ang pangulo sa pag-ingon nga ang pagpalig-on sa demokrasya, nga kinahanglan bukas nga opinyon ug kritisismo, tungod kay kini nakahatag sa kinabuhi sa kagawasan.
Ang pagpanalipod sa kamatuoran, sumala sa Presidente, mahinungdanon aron malikayan ang pag-usik sa atong kaugalignan, labi na karon nga dali nang makadaot ang bakak ug misinformation sa digital nga panahon.
Sa kataposan, iyang gihagit ang katawhan nga ipatigbabaw ang integridad, mubarog batok sa sayop, hatagan sa importansya ang panaghiusa taliwala sa nagkalain-laing panan-aw.
