Nagpahimangno ang Department of Social Welfare and Development (DSWD) Region 12 nga wala pa’y pinal nga desisyon kung adunay ikaduhang hugna sa fuel subsidy alang sa mga miyembro sa transport sector nga apektado sa padayon nga pagsaka sa presyo sa gasolina.
Sumala ni DSWD-12 Regional Director Loreto Cabaya Jr., padayon pa ang pagtimbang-timbang sa ahensya kalabot sa posibleng dugang nga financial assistance, samtang giapil usab sa ilang konsiderasyon ang ubang social protection programs nga mahimong makahatag og tabang sa mga driver ug operators nga grabeng naapektuhan sa krisis sa lana.
Gipatin-aw sa opisyal nga ang koordinasyon sa lokal nga panggamhanan importante, kay sila ang magpadala og pormal nga sulat o request ngadto sa DSWD aron maproseso ang paghatag og tabang sa ilang mga nasakupan nga apektado sa kahimtang.
Giila usab sa ahensya nga daghang tricycle driver ug ubang transport workers ang wala pa nakadawat sa miaging ayuda, apan gipahimangno nga mahimo gihapon silang mag-aplay o maapil sa lain pang programa sa DSWD nga angay sa ilang panginahanglan.
Bisan pa sa kawalay klaro sa ikaduhang hugna sa fuel subsidy, gipasalig sa DSWD-12 nga padayon nilang tutukan ang sitwasyon sa mga apektadong sektor aron masiguro nga adunay angay nga suporta sa mga labing nanginahanglan.
