Nagpahimangno ang Philippine Atmospheric, Geophysical and Astronomical Services Administration (PAGASA) sa posibleng pagtaas sa temperatura sa Rehiyon-12 samtang nagpadayon ang init nga panahon sa nasud.
Sumala sa ahensya, ang aktuwal nga temperatura sa nagkadaiyang bahin sa rehiyon posibleng moabot sa 38.2°C. Apan mas grabeng epekto ang mabati tungod sa heat index, nga gilauman nga mosaka sa 40°C hangtod 41°C sa General Santos City ug Cotabato City, nga pasok sa danger category.
Gipasabot sa PAGASA nga sa maong lebel sa kainit, posibleng makasinati ang publiko og heat-related illnesses sama sa heat exhaustion ug heat stroke kung dili mag-amping.
Dugang pa, gipahimangno usab sa ahensya ang padayon nga pagmonitor sa El Niño Alert, nga adunay 79% nga posibilidad nga maapektuhan ang nasud sa tunga-tunga sa tuig, nga posibleng makapasamot sa init nga panahon ug kakulang sa ulan sa ubang lugar.
Bisan pa sa grabeng kainit sa udto, gipaabot sa PAGASA nga posible gihapon ang mga localized rain showers o thunderstorms sa kahaponon hangtod gabii tungod sa epekto sa Easterlies.
Gipahinumdom sa ahensya ang publiko nga mag-amping, moinom og igo nga tubig, ug likayan ang taas nga exposure sa init ilabi na sa udto nga oras.
