GENERAL SANTOS CITY – Walay makasuhan sa nahitabo nga panagbangga sa commuter van ug 10 Wheeler truck tungod usa ka mechanical error ang nahitabo nga gikamatay sa 10 ka mga tawo ug pagkaangol sa lain pang lima nga anaa pa sa tambalanan. Kini ang nahimong tubag ni PLt.Col. Dominador Palgan Jr., labaw sa Traffic Enforcement Unit human gibutyag nga nipis na ang mga ligid sa van nga gisakyan sa 14 ka mga trabahante sa TEMPCO. Gikadugang ni Palgan nga pulos patay ang duha ka driver nga silang Noel Pudadera sa commuter van ug Cesar Andaya sa 10 wheeler truck busa walay makasuhan.
Sa gihimong pagsusi sa kapulisan sa commuter van nga bisan ug nagupok na kaayo apan klaro matud pa ang mga ligid niini lakip kadtong mibuto nga ligid nga gikaingong hinungdan sa pagkaligid ug pagkabangga niini sa katagbo nga cargo truck.
Dugang pa sa opisyal nga kung hilis na ang ligid ug kusog ang dagan sa sakyanan, buot ipasabot paspas ang pagtoyok niini ug muinit pag-ayo nga posebling hinungdan sa pagbuto sa ligid. Samtang miapela usab ang nahisgutan sa mga driver nga una mularga kinahanglan nga siguraduhon ang kundisyon sa sakyanan lakip ang iyang mga ligid.
