GENSAN – Usa ka 65-anyos nga senior citizen ang namatay human natumbahan sa kahoy pauli sa Yumang Extension, Purok Kaunlaran, Barangay San Isidro, ning dakbayan sa Heneral Santos, kagahapong adlawa, Marso 2, 2026. Giila ang biktima nga si Marichu Gadiane, residente sa Nuñez Street, Barangay San Isidro.
Matud ni PLTCOL Patrich Elma, labaw sa Traffic Enforcement Unit (TEU) sa dakbayan, nadawat nila ang impormasyon bahin sa insidente ug gilayon gisusi ang lugar pagkahuman sa trahedya.
Sumala sa anak sa biktima, miuli lang ang iyang inahan gikan sa Lagare Resort diin nag-apil sa usa ka tigum-tigum uban sa ilang kauban sa Zumba. Miuli lang aron kuhaon ang charger sa balay, apan wala na kini nakabalik. Nangita siya sa inahan pinaagi sa cellphone apan ang tubag sa TEU mao ang makapahugno sa kasingkasing: namatay na ang iyang inahan.
Ang pamilya ni Gadiane nagpangurog sa kasubo ug nagpangayo og hustisya, samtang lisod pa kaayo nila dawaton ang kamatayon sa ilang minahal nga inahan.
Sa karon, nagpadayon pa ang imbestigasyon aron masuta ang hinungdan sa pagkakatumba sa kahoy ug aron malikayan ang susamang insidente sa umaabot.
