GENSAN – Blangko pa gihapon ang pamilya sa tinuod nga hinungdan nganong niambak gikan sa ikatulong andana sa usa ka pampublikong tulunghaan ang usa ka estudyante dinhi sa Dakbayan sa Heneral Santos
Sumala sa impormasyon nga nakuha sa Bombo Radyo Gensan kalit lang kini niambak nga maoy nakapahingangha ug nakapahadlok sa ubang mga estudyante ug mga magtutudlo nga nakasaksi sa panghitabo. Dali dayong gihatagan og unang tabang ang biktima ug gidala sa balay tambalan aron matambalan.
Matud ni Nathaniel Nasayao, igsuon sa maong estudyante, nakurat na lamang siya sa nahitabo ug wala gyud siya kabalo kung unsa ba ang posibleng rason sa maong aksyon sa iyang igsoon. Gipasabot niya nga dili hilig ang biktima nga magpahibalo o mag-open up sa ilang pamilya kon adunay problema nga iyang giatubang.
Dugang pa ni Nasayao nga wala usab sila kahibalo kung may kalabotan ba kini sa problema sa eskwelahan, o sa iyang mga higala, tungod kay wala kini nagpakita og mga timailhan nga adunay gibati nga kabalaka o kalisod sa miaging mga adlaw.
Sa pagkakaron, padayon pa ang imbestigasyon sa eskwelahan ug sa mga otoridad aron mahibal-an ang tinuod nga hinungdan sa maong insidente. Gilauman usab nga matabangan ang pamilya sa biktima ug masuta kung adunay mga panghitabo nga posibleng nakaimpluwensya sa desisyon sa estudyante.
Samtang niini, nagpanawagan ang mga awtoridad sa publiko ug sa mga ginikanan nga magpabiling mapinanggaon ug atento sa kahimtang sa ilang mga anak, ilabina sa ilang mental ug emosyonal nga kahimtang, aron malikayan ang susamang mga insidente sa umaabot
