Lima ka adlaw gihapon nga pagasaulugon ang Tuna Festival 2026 sa General Santos City bisan pa sa dakong pagkunhod sa pondo alang sa selebrasyon.
Gikumpirma ni Joey Concepcion atol sa press conference nga dili tinuod ang unang impormasyon nga usa lamang ka adlaw himoon ang industry-based festival tungod sa mga kalamidad nga nasinati sa siyudad.
Gikan sa kapin-kulang ₱15 milyon nga pondo, mikunhod kini ngadto sa ₱5 milyon karong tuiga. Tungod niini, pipila ka mga kalihokan ug atraksyon ang dili na maapil, lakip ang carnival sa flea market, tinuig nga Tuna Congress ug pag-apil sa mga national artist.
Apan magpabilin ang Fish Fest alang sa mga mangingisda ug labasero sa Fish Port, ingon man ang Sugbahan sa Dalan.
Ang grandstand sa Tuna Festival 2026 ipahimutang sa City Hall Drive, atubangan sa City Hall, samtang abli na ang flea market nga nahimutang sa Oval Plaza grounds.
