Aduna nay natultolan nga posibleng gigikanan ang Regional Anti-Cybercrime Unit (RACU) kalabutan sa online threat nga mikatap sa social media batok sa duha ka tulunghaan sa General Santos City.
Matud ni P/BGen. Allan Manibog, Regional Director sa Police Regional Office 12 (PRO12), base sa inisyal nga imbestigasyon, wala naggikan sa Region 12 ang maong social media post kondili gikan sa laing rehiyon.
Dugang ni Manibog, ilang ginasubay karon ang eksaktong gigikanan sa maong account aron mailhan ang responsable sa pagpakatag sa hulga.
Nagtuo usab ang opisyal nga kasagaran sa nagahimo og ingong matang sa post mga tin-edyer nga aktibo sa social media ug usahay ginabuhat lamang kini isip prank.
Bisan pa niini, gipasiugda ni Manibog nga prank man kini o tinuod nga hulga, seryoso gihapon kini nga ginatratar sa kapulisan aron masiguro ang kaluwasan sa mga estudyante, magtutudlo, ug tanang personahe sa mga tulunghaan.
