Naka-half mast karon ang flag sa Pilipinas sa tanan nga government buildings isip kabahin sa obserbasyon sa “Day of National Mourning” alang sa mga biktima ni Bagyo Kristine.
Kini ang human sa deklarasyon ni President Ferdinand Marcos, Jr. pinaagi sa Proclamation No. 728 nga napetsahan niadtong Oktubre 30.
Sumala sa presidente, kabahin kini sa pagpakita og simpatiya sa mga pamilya sa mga napatay tungod sa bagyo.
Giawhag usab ang tibuok nasud nga maghalad og pag-ampo alang sa ikalinong sa kalag sa mga gibawian sa kinabuhi.
Base sa nakasaad sa Republic Act No. 8491 ukon ang Flag and Heraldic Code of the Philippines, kun adunay sama niini nga deklarasyon, naka-half mast ang national flag gikan sa pagsidlak sa adlaw hangtod sa pagsalop niini og ipatuman ang order sa tanan nga Philippine government buildings og installations niini og sa gawas sa nasud.
Ginahimo ang pag-half mast sa national flag isip pagpakita sa kalisod kun adunay mga trahedya nga dako gyud ang impact sa nasod.
Kahibaluan nga sa latest report sa National Disaster Risk Reduction and Management Council, mukabat sa 146 ka mga tawo ang napatay sa Pilipinas tungod sa baha, landslides, og uban pa nga insidente nga kabahin kang Severe Tropical Storm Kristine nga may international name nga Trami.
Photo by Michael Varcas
