Padayong nasinati sa mga residente sa General Santos City madag-umon nga kawanangan karong adlawa tungod sa epekto sa Intertropical Convergence Zone (ITCZ) nga padayon nga nakaapekto sa dakong bahin sa Mindanao.
Sumala sa state weather bureau, ang ITCZ maoy hinungdan sa dag-om sa panganod ug padayon nga pag-ulan nga mahimong mosangko sa pagbaha ug pagdahili sa yuta ilabina sa mga low-lying ug kabukiran nga lugar.
Tungod niini, gipahimangnoan ang publiko nga magmatngon batok sa posibleng flash floods ug landslides ilabina panahon sa kusog ug dugay nga pag-ulan. Gitambagan usab ang mga motorista nga mag-amping sa pagbiyahe tungod sa madanglog nga dalan ug limitadong panan-aw sa karsada.
Giawhag sa lokal nga panggamhanan ang mga residente nga magpadayon sa pagmonitor sa weather advisories ug mosunod sa mga pahimangno sa disaster response offices aron malikayan ang kadaot ug peligro.
