Giduso ni Councilor Franklin Gacal ang usa ka panukala sa Sangguniang Panlungsod sa ning syudad nga nagtumong sa paghatag og libreng sine alang sa mga senior citizen sa dakbayan.
Sumala sa konsehal, ang maong inisyatibo kabahin sa paghatag og dugang nga kalingawan ug social engagement alang sa mga tigulang isip pag-ila sa ilang kontribusyon sa komunidad. Pinaagi sa panukala, mahimong libre ang pagsulod sa mga kwalipikadong senior citizen sa mga piling sinehan sa dakbayan kaduha matag bulan bisan unsang adlaw ug oras.
Matod ni Gacal, dako ang mahimo sa maong programa aron mapalambo ang mental ug emosyonal nga kahimtang sa mga senior citizen pinaagi sa paghatag kanila og higayon sa pagpahayahay ug pakig-uban sa ubang miyembro sa komunidad.
Gilauman usab nga makigtambayayong ang lokal nga panggamhanan sa mga operators sa sinehan aron mahimong malampuson ang implementasyon sa maong programa kon kini mapirmahan na ni Mayor Lorelie Pacquiao.
