Mihangyo ang legal team ni kanhi Presidente Rodrigo Duterte sa International Criminal Court (ICC) nga i-postpone ang pagsugod sa trial proceedings hangtod sa 19 ka bulan.
Kini human sa confirmation of charges sa kanhi Presidente kaniadtong Abril 23, 2026.
Base sa gisang-at sa bag-ong lead counsel ni Duterte nga si Peter Haynes sa ICC Trial Chamber III, kinahanglan nila og dugang nga panahon aron maandam ang kaso.
Gihisgutan usab sa abogado ang nangaging mga kaso sa ICC nga gisugdan 14 hangtod 19 ka bulan human sa pagkumpirma sa mga kaso. Kung maaprobahan, ang trial mahimong ibalhin sa taliwala sa Hunyo ug Nobyembre 2027.
Sukwahi kini sa hangyo sa prosekusyon nga magsugod sa trial sa Nobyembre 30, 2026 o wala pay walo ka bulan human sa pagkumpirma sa mga kaso.
Dugang nga nangatarungan ang depensa nga “inappropriate” nga itakda ang petsa karon tungod sa wala pa masulbad nga mga isyu nga mahimong makaapekto sa trial.
Sumala ni Haynes, kinahanglan una nga mahibal-an sa Trial Chamber kung si Duterte “fit” nga moatubang sa trial.
Samtang giila sa depensa ang eksaminasyon sa panglawas nga gihimo sa kanhi presidente atol sa pre-trial phase, siya miingon nga ang iyang kondisyon nagpadayon sa pagkagrabe ug kinahanglan nga susihon pag-ayo sa dili pa magsugod ang bisan unsang husay.
