Anaa na sa full alert status ang National Capital Region Police Office (NCRPO) sugod ning semanaha, alang sa ikatulong State of the Nation Address (SONA) ni President Ferdinand Marcos Jr. karung Lunes, Hulyo 22.
Kini maoy gipahibalo ni NCRPO chief Police Major General Jose Melencio Nartatez Jr. dungan sa send-off ceremony sa mga pulis nga ipakatag alang sa SONA sa Pangulo.
Gikan sa kinatibuk-ang 23,000 ka police personnel nga ipakatag sa SONA, mokabat sa 8,000 ka mga polis ang idestino sa Commonwealth Avenue ug IBP Road areas nga bahinon ngadto sa 15 ka grupo. Gireserba usab sa QC LGU ang Commonwealth Avenue-Sandiganbayan area alang sa pro-government rally samtang ang Tandang Sora avenue alang sa mga nagprotesta batok sa gobyerno.
Sumala ni Philippine National Police Spokesperson Police Colonel Jean Fajardo nga ilang girekomenda ang pagtugot sa mga magprotesta sa Commonwealth Avenue-Tandang Sora Avenue sa adlaw sa SONA samtang ang pro-administration rally girekomenda ngadto sa Commission on Audit building area.
Matod sa kadagkoan sa NCRPO, maximum tolerance ang ilang ipatuman sa mga moprotesta sa adlaw sa SONA.
