SARANGANI-Gipahibalo nga ang Sarangani Province maoy mag-host sa 2027 SOX Tourism Summit human pormal nga giturn-over niini ang pag-host sa kalihokan atol sa 2026 SOX Tourism Summit sa Magpet, Cotabato Province niadtong Septiyembre 24.
Gitambongan sa mga tourism stakeholder gikan sa nagkadaiyang bahin sa SOCCSKSARGEN ang summit nga nagtutok sa “Reimagining Tourism Through Digital Innovation and Artificial Intelligence.”
Gihisgutan sa kalihokan ang digital tourism, destination storytelling, artificial intelligence, cybersecurity ug uban pang pamaagi aron mapalig-on ang industriya sa turismo sa rehiyon.
Girepresentahan ni Executive Assistant IV Ser Rosenkranz Espartero si Sarangani Governor Rogelio Pacquiao ug gipadayag ang suporta sa provincial government sa mga inisyatibo alang sa tourism development ug mas lig-ong regional collaboration.
Mitambong usab si Sarangani Provincial Information Officer Joana Grace Lapore ug ang Sarangani Tourism and Investment Promotion Center o STIPC isip kabahin sa delegasyon sa probinsya.
Ang 2026 summit gi-host sa Provincial Government of Cotabato kauban ang Regional Development Council XII-Economic Development Committee ug Department of Tourism Regional Office XII.
Samtang, ang pag-turn over sa 2027 hostship ngadto sa Sarangani maoy bag-ong lakang sa pagpalig-on sa kooperasyon sa mga probinsya sa SOCCSKSARGEN ug pagpauswag sa mas konektado, bag-o ug inklusibong turismo sa rehiyon.
