Nanawagan si Davao City 1st District Representative Pulong Duterte og komprehensibo ug dili “selective” nga imbestigasyon sa giingong mga nahitabong ‘extrajudicial killings’ atol sa panahon sa iyang amahan nga si kanhi Presidente Rodrigo Duterte.
Kini nahitabo atol sa pagkatukod sa Truth Commission, usa ka grupo nga gilangkuban sa mga ‘human rights advocate’ ug gipangulohan ni kanhi International Criminal Court o ICC Judge Raul Pangalangan.
Giinsistir sa kanhing presidential son nga dili mahimong pilion lamang ang mga butang nga gustong pangitaon og kamatuoran, ug hinuon kinahanglan nga komprehensibo ang imbestigasyon nga himuon sa maong komisyon.
Matod niya, kinahanglan nga masusing imbestigahan ang mga report sa mga pagpatay ug manubag ang bisan kinsa nga mapamatud-ang responsable.
Apan kung tinuod nga Truth Commission ang natukod, dili kini angay nga magpokus lamang sa “pipila ka kamatuoran,” kondili kinahanglan nga pangitaon ang tibuok kamatuoran.
Pangutana pa sa magbabalaod, kung tinuod nga Truth Commission, nganong daw adunay kamatuoran nga gi-fast track ug adunay kamatuoran nga naka-pending?
Gihisgutan usab sa magbabalaod ang isyu sa mga giingong maanomalyang flood control projects nga kinahanglan usab unta nga tutukan sa mga investigating panel sama sa Truth Commission.
Matod niya, kinahanglan kini mahimong focus sa mga imbestigador aron matino kung asa naadto ang kwarta, kinsa ang nakabenepisyo, kinsa ang nagmugna o misugyot sa mga proyekto, ug kinsa ang nanalipod sa mga nalambigit.
