Mas daghan nga mga botante ang gilauman nga magparehistro, magpa-transfer o magpa-reactivate sa ilang voter records sa higayon nga ablihan pag-usab sa COMELEC ang voter registration sa Nobyembre.
Sumala sa Commission on Elections o COMELEC, apil sa gilauman nga modaghan ang mga bag-ong botante ug mga kabatan-onan nga kwalipikado sa umaabot nga mga piniliay.
Gilauman usab sa poll body nga daghan ang mogamit sa maong panahon aron ma-update ang ilang voter records alang sa umaabot nga National and Local Elections ug Barangay ug Sangguniang Kabataan Elections.
Samtang, nag-andam ang COMELEC sa posibilidad nga magpagawas og Temporary Restraining Order o TRO ang Supreme Court may kalabotan sa postponement sa BSKE.
Matud ni COMELEC Chairman George Erwin Garcia, mahimong magkaproblema sa oras ang poll body sa pag-andam sa mga kinahanglanon alang sa eleksyon kung mausab ang kasamtangang timeline tungod sa TRO.
Lakip sa mahimong maapektuhan ang pag-andam sa mga election materials, logistika, pagproseso sa Certificates of Candidacy ug uban pang election preparations.
