Mga residente sa Gensan, gihangyo nga magbinantayon sa nagpadayon nga mga aftershocks

Gihangyo sa lokal nga panggamhanan sa General Santos City ang katawhan nga magpabiling mabinantayon tungod sa nagpadayon nga mga aftershocks human sa magnitude 7.8 nga linog niadtong Hunyo 8.

Matud kang Rombel Catolico, Public Information Officer sa siyudad, importante nga susihon sa mga residente ang kahimtang sa ilang mga panimalay ug makigkoordinar sa LGU aron masiguro kon luwas pa ba kini puy-an.

Dugang niya, ang kaluwasan sa katawhan maoy una nilang gihatagan og prayoridad busa ginaaghat ang tanan nga sundon ang mga tambag sa mga awtoridad samtang nagpadayon ang mga aftershocks.