GENERAL SANTOS CITY – Mututok sa massive nga pagpananom ug pagpatubo ug kahoy, ang pagsaulog sa Environment Month ning kasamtangang bulan, nga may temang “Connecting People to Nature”.
Atul sa programang Good Morning Philippines, gibutyag ni Kag. Beth Bagonoc, ang chairperson sa Committe on Environment sa Sangguniang Panglungsod, nga kini ang mga nag-unang aktibidad alayon sa nahisgutang kasaulugan.
Alayon niini, gihingusgan sa nasampit nga opisyal nga mahinungdanon ang kooperasyon sa publiko kalabutan sa pag-atiman sa kinaiyahan.
Dungan niini, ubay-ubay na ang gipanday nga ordinansa ug balaodnun alang sa pag-atiman sa kinaiyahan dinhi sa dakbayan, sama sa May Pera sa Basura, pagregulate sa paggamit sa plastic ug styrofoams, ug daghan pa, gawas pa sa ginapanday karon nga environment code.
Dinhi nakalatid ang pag-regulate ug pag-manage sa mga mineral ug quarry resources, kung asa daghang mga kasapaan nga napasagdan, code on water resources gumikan may pipila ka mga kabalayan sa siyudad nga tubig-dagat ang gatubod sa ilang mga gripo.
Gawas niini, lakip sa nakalatid sa naasoy’ng envi-code mao ang organic agriculture, fisheries code, ug daghan pa, alang sa pag-amping kinaiyahan hilabi na dinhi dakbayan.
Sumala pa nga nahuman na sa public hearing ang envi-code, ug sunod nga ipahigayon mao ang mga seminars alang sa pag-finetune ang naasoy’ng balaodnun.
Malaumon si Kag. Bagonoc nga una mahuman ang iyang termino, mapasa na ang envi-code, nga maoy gihimo niyang daw sa timeline, aron may mabilin usab siyang legasiya ug handumanan.
