Nangayo og pasaylo si Senador Juan Miguel “Migz” Zubiri sa pamilya sa namatay nga television host ug beteranong entertainment journalist nga si Lourdes Carvajal nga mas nailhan nga “Inday Badiday,” human niya nahisgotan ang ngalan niini atol sa mainit nga debate sa Senado kagahapon.
Sa usa ka post sa Facebook, giangkon ni Zubiri nga ang iyang pamahayag usa ka “slip of tounge” samtang gisupak ang video presentation ni Senador Imee Marcos bahin sa giingong Charter Change o Cha-cha ug term extension sa gobyerno.
Gipasiugda usab sa senador nga dako ang iyang pagtahod kang Carvajal, kinsa nailhan sa iyang mga showbiz talk show nga “See True” ug “Eye to Eye” niadtong dekada 80 ug 90.
Sumala ni Zubiri, si Inday Badiday kabahin sa popular nga kultura sa Pilipinas ug gihigugma sa daghang mga Pilipino tungod sa iyang talagsaon nga charm, wit, ug warmth.
Mitumaw ang isyu human gisupak ni Zubiri ang video nga gipakita ni Marcos sa plenaryo sa Senado nga giingong adunay alegasyon nga ang administrasyon nagduso alang sa Charter change ug term extension.
Gitawag ni Zubiri ang video nga “horrible propaganda” ug gihangyo nga tangtangon kini gikan sa rekord sa Senado, usa ka butang nga gisuportahan sa daghang mga senador gikan sa minority block apan gisupak ni Senador Rodante Marcoleta.
Sa taliwala sa iyang pagpakita, gihisgutan ni Zubiri si Inday Badiday samtang gisaway ang klase sa diskurso nga nahitabo sa Senado.
Sa iyang post sa pagpangayo og pasaylo, giklaro sa senador nga ang iyang kasuko naka-focus sa video nga gipakita ug wala gyud gituyo nga ipaubos ang handumanan sa namatay nga tigbalita.
