Gikumpirma sa mga awtoridad nga labing menos 82 ka tao ang namatay human sa pagbuto sa gas sa usa ka minahan sa karbon sa probinsya sa Shanxi sa China, gikan sa naunang report nga 90.
Nahitabo ang aksidente niadtong Biyernes sa gabii sa minahan sa karbon sa Liushenyu sa siyudad sa Changzhi.
Sa usa ka bag-o nga briefing, gikumpirma sa mga opisyal nga 82 ka tao ang namatay, kapin sa 120 ang naospital, ug duha pa ang nawala.
Gihulagway sa mga awtoridad ang sitwasyon human sa pagbuto nga “chaotic” samtang nagpadayon ang imbestigasyon sa hinungdan sa insidente.
Giingon sa mga opisyal nga “serious violations” ang nakit-an sa mga operasyon sa minahan, apan wala pa nila gipagawas ang kompletong detalye sa mga kalapasan.
Liboan ka mga rescuer ug medical personnel ang gipadala dayon sa lugar aron motabang sa mga search and rescue operations.
Gimando ni Presidente Xi Jinping sa China ang hinanaling pagluwas sa mga nawala ug nanawagan alang sa usa ka hingpit nga imbestigasyon aron manubag ang mga nalambigit sa pinakagrabe nga katalagman sa pagmina sa China sulod sa kapin sa 15 ka tuig.
Samtang, migawas ang mga taho bahin sa mga paglapas sa mga protocol sa kaluwasan sa minahan, lakip ang giingong dili pagsunod sa mandatory tracking devices para sa mga trabahante ug dili makanunayon nga mga blueprint sa pagmina nga gihatag sa mga awtoridad.
Giingon usab sa media sa estado nga ang gidaghanon sa mga tao sa sulod sa minahan sa panahon sa pagbuto anaa sa doble nga ihap sa giingon sa opisyal nga mga rekord sa kompanya, nga nagpasamot sa sitwasyon alang sa mga operasyon sa pagluwas.
