Wala’y nakitang negatibong epekto ang Malacañang kang Presidente Ferdinand Marcos Jr. kung mabasura ang impeachment batok kang Bise Presidente Sara Duterte human mabalik sa Kamara ang articles of impeachment gikan sa Senado.
Ang Palace Press Officer nga si Atty. Claire Castro niingon nga wa maapil ang presidente sa debate sa mga senador ug gani nagdistansya sa isyu tungod kay ang mga magbabalaod maoy nagdumala sa impeachment sa bise presidente.
Matod niya makita sa katawhan kung kinsa ang nagsunod sa proseso ug kinsa ang nagduwa aron dili madayon ang impeachment trial.
Matod niya, wala manghilabot ang presidente sa impeachment apan sa kinatibuk-an, gikinahanglan ang transparency ug accountability sa tanang opisyal sa gobyerno, dili lang sa impeachment trial.
Matud ni Castro nga kon proseso ang hisgutan, kinahanglang sundon ang balaod, sundon ang Konstitusyon ug dili dula-dulaan ang mga proseso.
Kon mabasura ang impeachment batok sa bise presidente, si Castro niingon nga hukman sa katawhan ang Senado sa ilang gihimo atol sa impeachment trial.
