Lagmit dili tagdon sa United Nations Human Rights Council ang panawagan sa usa ka Japanese non-government organization (NGO) nga buhian si kanhing Pangulong Rodrigo Duterte gikan sa kustodiya sa International Criminal Court, matod sa Department of Foreign Affairs.
Sa usa ka pahayag niadtong Huwebes, Mayo 21, giingon sa ahensiya nga kasagaran na nga makadawat ang UN og ing-ani nga mga reklamo ug kasagaran kini giisip lamang isip procedural nga butang nga walay klarong komento o aksiyon.
Dugang pa sa DFA, dili kini ang unang higayon nga ang International Career Support Association (ICSA) nagpasaka og giingong walay basehang alegasyon sa UN, ug sa miaging mga kaso wala usab kini nagresulta og positibong aksiyon.
Giingon usab nga ang pahayag sa DFA usa sa talagsaong higayon nga kini nagkomento sa kaso sa kanhing presidente sukad siya gidakop niadtong Marso sa miaging tuig, kay kasagaran nila gipasagdan ang media queries sa mga law enforcement o gisunod ang posisyon sa gobyerno nga dili na moapil pag-usab sa ICC.
Matud sa report, niadtong Martes, Mayo 21, nagsumite ang NGO og tulo ka panid sa dokumento nga nag-akusar kang Presidente Ferdinand Marcos Jr. nga matod pa nagplano sa pagpadala kang Duterte sa The Hague aron maapektohan ang pamilya Duterte sa wala pa ang eleksyon sa 2028, ug naghangyo usab kini sa iyang pagpahawa o pagbuhi.
