Gisusi na sa Philippine National Police – Criminal Investigation and Detection Group o PNP-CIDG kung kinsa ang anaa sa likod sa giingong paghatag og sayop nga impormasyon kang suspended Senate Acting Sergeant-at-Arms Mao Aplasca nga mitultol sa pagpamusil sulod sa Senado niadtong Mayo 13.
Sumala kang CIDG director Police Major General Robert Morico II, gisulayan sa mga imbestigador nga mailhan kung kinsa ang naghatag kang Aplasca sa impresyon nga “under attack” ang Senado, nga maoy hinungdan nga nangandam ang security personnel alang sa armadong komprontasyon.
Giingon ni Morico nga gimandoan ni Aplasca ang security personnel nga “lock and load” sa wala pa nahitabo ang shooting incident.
Gitawag usab kini sa CIDG nga “panic firing” tungod kay nagtuo ang mga personnel nga adunay daghang mosulong kanila bisan wala kini mahitabo.
Dugang pa ni Morico, dili lamang si Aplasca ang nagdesisyon sa maong insidente tungod kay adunay usab siya mga deputy gikan sa Office of Sergeant-at-Arms o OSAA, busa ilang gisusi kung kinsa gyud ang naghatag sa sayop nga impormasyon nga adunay pag-atake.
Matud pa niya, posible untang malikayan ang nahitabo kon adunay hapsay nga koordinasyon ug komunikasyon tali sa OSAA ug security personnel sa kasikbit nga Government Service Insurance System o GSIS building.
Samtang niini, human mapakyas si Aplasca ug uban pang personnel sa OSAA sa pagtunga sa CIDG, miapelar si Morico kanila nga makigtambayayong sa imbestigasyon.
Una nang girekomenda sa CIDG ang pagsang-at og kaso batok kang Aplasca ug duha pa ka personnel niini tungod sa giingong paglapas sa Private Security Services Industry Act.
