Gipanghimakak ni Senador Erwin Tulfo ang nag-unang pahayag ni Senador Pia Cayetano nga wala’y bisan kinsa sa mga senador nga nangumusta sa mga naipit atol sa kagubot sulod sa Senado niadtong Mayo 13, 2026.
Una nang gibutyag ni Cayetano nga bisan dugay na niyang kaila ang pipila sa iyang mga kaubang senador, wala gyud matod pay nangumusta kanila atol sa adlaw sa kagubot.
Apan sumala ni Tulfo, sunod-sunod nga nagpahayag og kabalaka ang mga miyembro sa minority pipila ka minuto human sa nahitabong shoot out.
Lakip sa iyang gihisgutan nga nangumusta sa kahimtang sa majority bloc members mao sila Senador Kiko Pangilinan, Senador Bam Aquino, ug Senador Sherwin Gatchalian uban sa uban pang miyembro sa bag-ong minority.
Giingon usab ni Tulfo nga siya mismo mipadayag og suporta sa iyang mga kaubang senador nga nahibilin sulod sa Senate compound ug nakapadala siya og mensahe alas-9:50 sa gabii.
Dugang pa niya, nag-ampo usab siya alang kanila samtang atua siya sa Baclaran Church niadtong gabhiona nga nahitabo ang pagpamusil.
Sa laing bahin, nagpahayag si Tulfo og pagsalig sa imbestigasyon nga pagadumalahan sa Senate Committee of the Whole aron matubag ang mga pangutana kalabot sa kontrobersyal nga pagpamusil sulod sa Senate compound.
