Gibasura sa Pre-Trial Chamber I sa International Criminal Court ang hangyo sa depensa ni kanhing Pangulong Rodrigo Duterte nga tugotan silang makaapela sa desisyon kabahin sa mga kasong “crimes against humanity” nga may kalabotan sa iyang kampanya batok sa ilegal nga droga.
Sa 12 ka panid nga desisyon, hiniusang gibasura sa tulo ka huwes nga sila Presiding Judge Iulia Antoanella Motoc, Judge Reine Adélaïde Sophie Alapini-Gansou, ug Judge María del Socorro Flores Liera ang maong hangyo sa depensa sa kanhing pangulo.
Matod sa kampo ni Duterte, sobra ka halapad ang sakop sa mga kaso nga gisang-at batok kaniya, apan sumala sa Prosecution, husto lamang ang paglatid sa korte sa coverage sa kaso ug klaro usab ang basihanan sa mga ebidensyang gigamit sa ilang desisyon.
Giingon usab sa depensa nga dili igo ang pagpasabot sa korte sa mga ebidensya nga gigamit, apan mitubag ang Prosecution nga gisunod sa Pre-Trial Chamber ang hustong proseso ug dili kinahanglan nga tagsa-tagsaon pa ang tanang ebidensya sa desisyon.
Kung mahinumdoman, niadtong Abril 23 gikumpirma sa ICC ang mga kaso batok kang Duterte kalabot sa giingong mga pagpamatay ilawom sa iyang kampanya kontra ilegal nga droga, lakip ang mga insidente sukad pa sa iyang pagka-mayor sa Davao City hangtod sa iyang pagkapresidente.
Lakip sa iyang giatubang nga mga kaso mao ang murder ug attempted murder isip crimes against humanity nga may kalabotan sa mga biktima sa nagkalain-laing operasyon sa Pilipinas gikan 2013 hangtod 2018.
Una nang gibasura sa ICC Appeals Chamber ang lahi nga apela sa kampo ni Duterte mahitungod sa hurisdiksyon sa korte ug giila usab nga moot o wala nay kalabutan ang hangyo nga mapagawas ang kanhing pangulo.
