Usa ka kusog nga magnitude 6.6 nga linog ang mitay-og sa kadagatan sa habagatang bahin sa Balut Island sa Munisipyo sa Sarangani, Davao Occidental alas 7:34 Hunyo 26, 2026, sumala sa Philippine Institute of Volcanology and Seismology (PHIVOLCS).
Gibutyag sa PHIVOLCS nga ang sentro sa linog nahimutang 90 kilometro sa habagatan-kasadpan sa Balut Island ug adunay giladmon nga 10 kilometro.
Tungod sa kusog sa linog, nabati kini sa nagkalainlaing lugar sa Mindanao. Ang labing kusog nga natala nga intensity mao ang Intensity V sa Kiamba, Sarangani. Samtang Intensity IV ang nasinatian sa mga lungsod sa Don Marcelino ug Santa Maria sa Davao Occidental.
Naeksperyensyahan usab ang Intensity III sa Davao City ug Matanao sa Davao del Sur, samtang Intensity II ang nabati sa Digos City ug sa mga lungsod sa Monkayo, Mawab ug Maragusan sa Davao de Oro.
Sa pagkakaron, wala pay opisyal nga report bahin sa dagkong kadaot o mga naangol nga resulta sa maong linog. Bisan pa niini, gipahimangnoan sa PHIVOLCS ang publiko nga magpabiling alerto batok sa posibleng mga aftershock ug sundon ang mga giya sa lokal nga mga awtoridad aron masiguro ang kaluwasan.
